Sommaraktivitetar
Om sommaren er Lærdal den perfekte staden for ein aktiv ferie. Eit unikt landskap innerst i Sognefjorden byr på aktivitetar og opplevingar i ypperste klasse. Her finn du oversikt over fotturar, sykkelturar, samt idrettar og idrettsanlegg i nærleiken. Sjå oversikt over kva aktivitetar som er tilgjengeleg i sommarhalvåret via knappen nedanfor.
Fotturar rundt Lærdal sentrum
Sentrum-Hedler-Mjølkeflaten-Stødno-Øyabrui-Sentrum
Start i sentrum, gå over brua mot Fodnes (riksveg 5) og ta til venstre.
Føl stien langs vatnet til du kjem til skiltet retning Mjølkeflaten og dagsturhytta.
Frå Mjølkeflaten går du vidare mot Stødno,
deretter på den asfalterte gardsvegen til Øyabrui/sjukehusbrui, og vidare langs elva mot sentrum.
Rundturen tek omlag 2 timar.
Sviggum-Storehaugen-Hogneåsen-Habben
Start frå Sviggum (krysset frå E16, mot sjukehuset), her er det godt merka sti heilt opp til Storehaugen, 908 m.o.h.
Du kan returnera same veg, eller du kan gå på sti i omlag same høgd vestover, til du kjem til stølen Hognåsen.
Herifrå går det god sti heilt ned att til bilvegen.
Du kjem ned ikkje langt frå Lærdal Hotell, ein spasertur frå Lærdal ferie-og fritidspark og sentrum.
Sjukehusvegen-Oftedalen
Start ved Oftabrua, ca 300 m aust for sjukehuset, 2 km frå sentrum.
Gå på venstre sida av elva oppover til stølsbrui, over denna til informasjonstavla der stølsvegen byrjar.
Stien har turrettleiing og stadnamnskilt.
Oftedalen ligg ca 780 m.o.h. og turen tek omlag 2-3 timar frå Ofta.
Det er mange fine punkt oppover her, der du kan nyta fantastisk naturlandskap og utsikt over dal og fjord.